Editorial

TKP huanga kan thil sawi zin leh kan tawngkam hman lar ber chu ‘Krista leh Kohhran Tan’ tih hi a ni hial ang. Thutiamah kan sawi rual a, slogan ang atan kan hmang a, kan lam ri deuh chhen a ni. Chutih mek lai chuan ngun zawkin kan chhut ngai em le?

Pathian hian tih tur dang a hriat tawh loh lutuk vang emaw, a kuthlei satliah vang emawin mihring hi a siam ngawt lo a, chhan neiin a siam zawk a ni. Chu a siam chhan chu kawng hrang hrangin sawi theih mah se a khaikhawm thei ber chu ’Ama tan a siam’ tih hi a ni ang.

Khawvela mihring kan lo awm ve ngawt chhan, kan lo pian ve hlawl chhan hi eng dang vang ni loin Pathian ta ni turin a ni a, kan nun pumpui hi a tan a ni tur a lo ni.

Kohhrana kan inhman te, kan rawngbawlna, heng kan inkhawm, kan fellowship, kan hnatlang thawh, kan hlazir etc zawng zawng hi mihring tan anga kan tih a, keimahni lansarh vena tur, kan hmingthatna tur ang atan tea kan ti a nih chuan tlin loh chin, peih loh chin kan nei thuaiin a rinawm.

Mahse, chung chu a chhan dik tak tur, Krista Tan han ni thung se la chuan awmzia a neiin a va thawk hlawk dawn em. Rawngbawlna piah lamah kan zirna te, kan hna te, kan nitin nun hi Krista leh Kohhran Tan ti chung zela hman han ni thei se la a va tha dawn em.

Chhiar Zawmna: Poiema Issue